Giséle Veen-Jonkhout
Gisèle Marie Veen-Jonkhout (☆ 13 di desèmber 1957 na Otrobanda - † 3 di yanüari 2024 na Kòrsou) tabata un hurista i fiskal di Kòrsou. E tabata e promé fiskal femenino i e promé ofisial di prensa di Ministerio Públiko den historia di Antias Hulandes.[1]
Biografia editá
Gisèle Jonkhout a nase i lanta na Kòrsou komo promé yu di Edith Jonkhout-Romijn i Jacques F. Jonkhout, na bida director di All American Cables. E tabatin dos ruman muhé. Siguiendo su interes pa lei for di chikitu el a skohe pa bai studia lei. Na 1983 e ta gradua na Universidat di Antia Hulandes (UNA).[2] E mesun aña Veen-Jonkhout a kuminsá traha na Korte Komun di Antia i Aruba, unda el a haña e oportunidat pa sigui e kurso di RAIO (rechtelijk ambtenaar in opleiding), ku ta e treinen pa bira sea hues of fiskal. E ta skohe pa e karera di fiskal.
For di 1985 e tabata traha na Ministerio Públiko di Antias Hulandes i despues di 10 di òktober 2010 na Ministerio Públiko di Kòrsou. Veen-Jonkhout a okupá varios puesto den e ministerio. Entre otro, el a bira e promé fiskal femenino di Antias Hulandes i e promé ofisial di prensa di Ministerio Públiko di Antias Hulandes, den kual funshon el a bira konosí serka e públiko. Komo fiskal e tabata na warda kada seis siman, ocho dia tras di otro, 24 ora pa dia.[2] E tabata atendé ku asuntunan hubenil i di droga i regularmente tabata fungi komo fiskal mayó interino.[3] Na desèmber 2013 el a retira despues di 30 aña di servisio.
Gisèle Veen-Jonkhout a fayesé dia 3 di yanuari 2024 na edat di 66 aña. E tabata kasá ku Henk Veen i tabata mama di un yu hòmber.
Fuente, nota i/òf referensia
|